أبرز تصريحات أحمد سمير فرج: عادل إمام قعد معايا يقنعني مدخلش قسم إخراج.. والناس قالتلي فيلم بنات العم صدقة لأننا ضحكناهم
حل المخرج أحمد سمير فرج ضيفًا على أحد البرامج، وتحدث خلاله عن مشوراه الفني وتفاصيل حياته الشخصية، بجانب الحديث عن سلسلة المداح وسبب مناقشته للسحر والأعمال.
أبرز تصريحات أحمد سمير فرج
وفي السطور التالية نقدم أبرز تصريحات المخرج أحمد سمير فرج:
- كانوا عايزني الأول في فيلم المشبوه وأمي رفضت، وأكيد كريم عبد العزيز كان أفضل في الحتة دي، أنا معنديش جرأة الوقوف أمام الكاميرا، أقدر أوجه الممثل لكني معنديش الجرأة دي خالص، ومن صغيري بنتمي للإخراج، وأبويا كان مدير تصوير وشايف الإخراج مهنة من لا مهنة له.
- عادل إمام ساب المسرحية والبروفات وقعد معايا يقنعني ساعة إلا ربع إني مدخلش قسم إخراج وأدخل تصوير، أو مونتاج ويبقى عندي مهنة.
- كان فيه حرب شديدة جدًا بيني وبين أبويا، ودكاترة المعهد كان عندي مشاكل معاهم إن ليه دخلت إخراج مش تصوير، وده عملي دافع إني أشتغل ومش عايز حد يعرف أنا مين غير لما أثبت نفسي.
- كنت أعرف أحمد فهمي وهشام ماجد وشيكو، وكنت متحمس ليهم جدًا من وقت فيلم ورقة شفرة، وكانوا هيعملوا الرجل العناب فيلم، واعتذرت عنه وبعدها بسنين اتعمل مسلسل.
- فيلم بنات العم كان صعب على أحمد فهمي وهشام ماجد وشيكو، وكنت بجيب البنات يقرأوا الفيلم كله قدام الولاد والعكس، فيبدأ البنات يقولوا إحنا مبنتكلمش كده وبدأوا ياخدوا من شخصيات البنات، وكل واحد كان في مكانه الصح، لأننا تعبنا أوي في تحضيرات الفيلم ده.
- الهدف الرئيسي من فيلم بنات العم هو الضحك فقط، والشخصيات حسينا إنهم مننا، ونزل في وقت صعب أوي بعد الثورة، وأعلى إيراد يومي للفيلم ده كان يوم مذبحة بورسعيد، السينما اشتغلت 24 ساعة الناس مش عايزة تروح.
- نجحنا في إننا نضحك الناس في فيلم بنات العم الضحك لمجرد الضحك من غير رسائل، الناس مهمومة، وناس كتير قالتلي الفيلم ده صدقة.
- مريت بتجارب مع بعض الأصدقاء عن السحر والأعمال قبل المداح بسنين وشفت الأذى شكله إيه، حسيت إن المداح فرصة من عند ربنا نوعي الناس إن الأعمال والسحر مرعبة.
- أحد الشيوخ سنة 2013 اللي بيعالج من غير فلوس، قالي إن اللي بيعمل سحر لحد عشان يتوب له شرط واحد إنه يروح للشخص ويقوله عملتلك عمل مسامحني؟، لو قال لأ يموت كافر، ودي معلومة مش عند الناس.
- بعض رجال الأعمال كانوا بيبعتوا يجيبوا الشيخ الفلاني من المغرب عشان يقضي معاهم 48 ساعة.
- كان نازل قدام المداح مسلسلات متكلفة أكترمن 100 مليون جنيه، وإحنا كان تكلفة المسلسل وقتها 27 مليون جنيه يعني ولا حاجة، وقفلنا رمضان وإحنا من الأعلى 5، واتطلب مننا جزء ثاني.
- بيطلع إشاعات كتير إن المداح بيحصل فيه حاجات غريبة، ولكن دي عقل باطن مش أكتر.
