زينة تكشف تفاصيل تعرض نجلها لعقر كلب: هاخد حق ابني بالقانون
كشفت الفنانة زينة، منذ قليل، تفاصيل تعرض نجلها لعقر كلب في أثناء لعبه كرة قدم، بإحدى المناطق السكنية الشهيرة.
زينة تكشف تفاصيل تعرض نجلها لعقر كلب: هاخد حق ابني بالقانون
وقالت زينة خلال مداخلة لـ برنامج الحكاية مع الإعلامي عمرو أديب: امبارح نزلت ولادي عند الملعب جنب البيت وهو خاص بالكومباود وروحت السوبر ماركت، جالي تليفون ابني بيعيط وبيقولي الحقيني يا ماما فيه كلب واحد سايبه علينا وهيموتنا، الواحد ده دخل له الملعب وقاله عايز ألعب ابني قاله لا دا حجزنا، لو عايز تيجي تلعب معانا تعالى، الولد قاله لا وهعرف أخرجك إزاي وجابله الكلب وبيجري وراه بيه.
وواصلت زينة: ابني جري من الكلب وهو بيجري وقطع ورجله اتعورت، وابني التاني عشان عنده كلب عارف النظام والكلب خربشه في رجله، قولت للولد أنت ابن مين.. العيب مش عليك أنا هتكلم مع مامتك اللي سابتك تخرج مع كلب كبير زي ده.. أنا مقدرش أخرج ابني بكلب زي ده.
واستكملت زينة حديثها: الولد دخل البيت ومامته طلعت بتزعق وبتقولي أنتي بتشتمي ابني.. قولتلها أنا جاية أقولك لحد عندك وبقولك متخرجيش الولد بالكلب تاني.. وخدت بعضي ومشيت وقولتلها أنا هعرف آخد حقي بالقانون.. زوجها حاول يسكتها وهي الست معملتش احترام لحد.
زينة تكشف أزمة أطفالها والكلب
وأضافت: أنا مش هستنى لما عيل من عيالي تموت بسبب الكلب.. رئيس المباحث قالي هنروح نجيب الناس ونروح القسم علشان نعمل محضر.. اتصلت بأخويا وروحت القسم لقيت 3 رجال محترمين بيعرفوني بنفسهم أنا النائب كذا كذا.
واختتمت حديثها قائلة: المحضر فجأة اتحول لإداري ومش لاقيين الكلب والكاميرات صورت كل حاجة.. هما لما حولوا ابن محمد رمضان لدار الرعاية.. إحنا بس اللي بنتحاسب في البلد دي؟ إحنا في دولة قانون وهعرف أخد حقي كويس بالقانون وأنا متعودة أخد حقي بالقانون.
جدير بالذكر أن زينة شاركت في الموسم الرمضاني الماضي من خلال مسلسل العتاولة، بطولة أحمد السقا تأليف مصطفى جمال هاشم وإخراج أحمد خالد موسى وشارك في العمل كل من طارق لطفي، نسرين أمين، باسم سمرة، فيفي عبدة، أحمد كشك، مصطفى أبوسريع ودارت الأحداث في إطار اجتماعي شعبي.
