أهالي الإسكندرية يروون لحظات الرعب في العاصفة المفاجئة: فكرنا القيامة هتقوم
تعرضت مدينة الإسكندرية، لسقوط أمطار غزيرة ورعدية خلال الساعات الأولى من صباح اليوم السبت، صاحبها حبات كبيرة من الثلج ونوبات من البرق والرعد، ما أدى إلى غرق الشوارع والطرقات والسيارات، بالإضافة إلى حالات الخوف والفزع.
أهالي الإسكندرية يروون لحظات الرعب بسبب الأمطار
وروى عدد من سكان مدينة الإسكندرية، لحظات الرعب التي عاشوها بسبب سقوط الأمطار الغزيرة الرعدية والتي استمرت لمدة تزيد عن 60 دقيقة، حيث صاحبتها نشاط الرياح بسرعة 90 كم/س، وقال صاحب حساب عبر موقع التواصل الاجتماعي فيسبوك: اللي مش عارف إيه بيحصل في الإسكندرية، فجأة الناس صحيت في نص الليل على صوت رعد وبرق وثلج كالحجارة، والثلج متراكم على أسطح العمارات لدرجة تساقط المياه داخل الشقق السكنية، الصوت كان مرعب، وعربيات اتكسرت وتاندات وقعت وزجاج اتكسر.. حرفيا حالة رعب.
وقال صاحب حساب آخر، في منشور له عبر فيسبوك: لحظات مرعبة في إسكندرية تخلي الواحد يراجع نفسه وحساباته مليار مرة، من أسبوعين زلزالين ورا بعض ودلوقتي رعد وبرق ومطر ورياح وعاصفة مفيش حاجة موقفاها، تخيل في ثواني قليلة حصل ده والدنيا اتقلبت، تخيل إن دي حاجة أقل من البسيطة عند ربنا.
وأضاف أحد سكان مدينة الإسكندرية، في منشور له: في إسكندرية الدنيا اتقلبت فجأة، صوت الرعد كان مرعب، والبرق بيشق السماء والمطر نازل كأنه مش هيوقف، ناس كتير خافت وناس قالت دي نهاية العالم، وفكرنا إن القيامة هتقوم دلوقتي، واللي حصل النهاردة كان مجرد تنبيه إن ممكن فعلًا تيجي لحظة نقوم فيها كلنا من غير سابق إنذار، ودا الفرق بين النهاردة ويوم القيامة.
