عملنا فيديوهات غير أخلاقية ونزلها على السوشيال ميديا.. سيدة تستغيث من طليقها: مش عارفين نمشي في الشارع أنا وعيلتي
استغاثت سيدة تُدعى آية من تشوية طليقها المقيم بالأردن لسمعتها بعد نشره صورًا وفيديوهات مفبركة غير أخلاقية عبر منصات السوشيال ميديا بعد اختراقه لهاتفها وهواتف أفراد من أسرتها، حيث استمر لـ 3 سنوات في نشر فيديوهات تمس سمعتها هي وعائلتها ما تسبب في مشاكل كبيرة لهم بين جيرانهم وفي وظائفهم وصلت لحد الفصل من العمل.
سيدة تستغيث من طليقها
وقالت آية في تصريحات خاصة لـ القاهرة 24: بقالي 3 سنين بعاني من تصرفاته وأحنا متجوزين، اللي حصل أنه من ساعة ما سافر وأنا عرفت إنه اتجوز عليا في الأردن ووصل لمرحلة أنه مكنش بيصرف عليا ولا عيالي خالص، ولما كنت بطلب منه كان بيزعقلي جامد، وكنت عايشة وساكتة وخلاص إنما في مرة كنت بوصل عيالي للمستشفى عشان عندهم السكر وواحد جارنا بعتلي على الواتس عشان ننزل ويودينا، وقتها جوزي لأنه عامل اختراق لموبايلي شاف الرسالة واتهمني بالخيانة وبهدلني كأنوا بيتحجج عشان يطلقني وعايز يجيب المشكلة فيا.
وأوضحت: تفاجأت أنه عامل اختراق لموبايلي أنا وأقاربي، وبقاله 3 سنين بياخد صوري من على التليفون وصورهم وبيعمل بيهم فيديوهات غير أخلاقية لتشوية سمعتنا وبينزلها على صفحات عنده وبالفعل نجح يشوه سمعتي وسمعة عيلتي وأولادي.
وواصلت: بسببه خالي اتفصل من شغله واترحل من الأردن وكمان المحامية اللي كانت ماسكه قضيتي ضده سابتها عشان خافت من تشوية سمعتها أو ينزلها فيديوهات مسيئة ويشوه سمعتها، ومن 3 أيام اتطلقت منه بعد ما عمل توكيل للمحامي بتاعه، وكنت فاكرة أن بعد الطلاق هترحم من كل اللي بيحصل لكن للأسف الموضوع زاد معاه وبقى مستفز ومش سايبني في حالي، ونفسي آلاقي حل لأني تعبت وعملت كل حاجة ممكن تتعمل ومبقتش عارفة أمشي أنا وأولادي في الشارع من كلام الناس علينا والفضايح.
